呢幾日收唔到教院電郵通知，相信個位同學唔係H1N1，虛驚一場。

上星期六小組，講職場分享，當負責人問我地唔考慮信仰角度，如果十分滿分既話，會俾自己既工作幾多分？點解值咁多分？扣分既原因響邊度？

輪到我講，我俾六分。因為有滿足感，睇見學生進步有成就感等等等等值六分，扣個四分呢？勞氣啦、勁多嘢做做到放工都要做啦，以及……跟同事關係都幾淡薄。

淡薄唔係指反面，其實響工作層面，同事之間都幾合作，同聲同氣；但係工作之外，都幾少溝通。舊時響永隆，番工時間經常吹D無聊既水（真係好無聊，但互吹後就friend左）；知道有同事下年可能冇得續約就幫佢睇報紙，甚至剪低有關廣告俾佢；得閒就約出去飲茶；甚至有時會送張金句卡互相鼓勵……

黎左何記五年，跟我同期入職都差不多離開晒，其他同事其實有佢地牢固既網絡，都幾難打入去佢地既圈子。永隆個種生活好耐都冇啦，有時自己去第二度同人傾野／做野，離開座位前仲見到其他同事響自己附近，當番到埋位，前後左右既同事可以完全消失！因為個個去晒食飯／放工……其實都覺得自己幾慘、幾孤獨。

有時諗，為左呢個原因辭職，會唔會好戇居？定係要重新為自己既人際關係定位？